سيدة عاملة





تحديات كبيرة بتقابلنا كلنا يومياً في شغلنا، و خصوصاً إحنا الستات . إنك توصلي وجهة نظرك ، تقنعي اللي معاكي برأيك ،  تدافعي عن حقوقك ، ترسمي حدود في تعاملاتك  و تتجنبي الأقاويل. و علشان إنتي مش بس نص المجتمع الحلو ، إنتي كمان بتعلمي النص التاني الجمال ، هنعرف مع بعض شوية قواعد في الإتيكيت هتساعدك يوم بيوم في حياتك العملية.

 

الملابس

لكل مكان الملابس المناسبة ليه ، يعني مينفعش تروحي العمل بلبس نادي أو لبس سهرة ، إختاري الملابس البسيطة الهادية اللي متلفتش النظر ليكي .

المشاكل الشخصية

المشاكل الشخصية سيبيها في البيت ، أكيد زمايلك في العمل أو عملاء الشركة ملهومش ذنب يتحملوا عصبيتك أو ضيقك . كمان خلافاتك الزوجية ، مشاكل أولادك ، ظروفك المادية كل ده موضوعات مينفعش تكون محور أحاديثك مع الزملاء ، وقت العمل لمهام العمل و بس .

الإحترام

إلتزامك و إحترامك لنفسك و بعدك عن الصوت العالي و المزاح الغير مناسب بيخلي الكل يحترمك .

 

الهمس

لو عندك علاقة صداقة  مع زميلة عمل مينفعش أثناء العمل تهمسي معاها و تنفردي بيها في وجود الكل ، ممكن تقابليها خارج العمل أو تكلميها في التليفون ، لأن ده بيضايق بقية الزملاء .

 

الهداية

الهدايا من أي عميل للشركة غير مقبولة لأنها بتاخد شكل الرشوة المقنعة ، و الهدايا المتبادلة بين الزملاء يفضل إنها تاخد شكل هدايا جماعية مجاملة في مناسبة لأي زميل ، لأن أي هدية فردية مع زميل ممكن تثير الاقاويل حتي لو كانت هدية بريئة .

 

المواضيع المثيرة للجدل

إبعدي في حديثك مع الزملاء عن مناطق الخلاف و اللي ممكن تثير حساسية لأن ده هيعكر جو العمل و هيثير حفيظة الكل و هيقسم الزملاء لفريقين متصارعين ، دايما دوري علي المناطق المشتركة بينكم .

التعامل

التعامل مع الجميع رئيس و مرؤوس بنفس إسلوب الإحترام ، لأن التعامل بإسلوبين معناه تملق و كبر و ده يتعارض مع الإتيكيت .

الأكل

أكيد تناول أكلات ليها ريحة نفاذة مش مناسب لمكان العمل ، و الأفضل تناول سندوتشات بسيطة .

 

النظافة

النظافة عامل مهم لجمالك و ريحة الجسم و الفم الحلوة عامل مهم في الإتيكيت ، لكن خلي بالك متستعمليش برفان ريحته نفاذة تضايق الآخرين .

 

الموبايل

لو حبيتي تتكلمي في الموبيل لامر ضروري حاولي تقللي فترة المكالمة و يفضل إنك تسيبي المكتب و تتكلمي في مكان تاني بعيد عن الزملاء  بصوت هادي غير مسموع للكل .

التحية

التحية بتقرب القلوب من بعض ، سلمي علي الزملاء في الصباح و عند الإنصراف .

تغيب زمايل العمل

لو تغيبت زميلة عن العمل بدون إذن لازم تسألي عليها و تطمني عن سبب غيابها ، و لو زميل يفضل تكلموه جميعا في العمل منعا للأقاويل .

وصلي وجهة نظرك

مينفعش الصوت العالي يكون هو وسيلتك للمطالبة بحقوقك أو التعبير عن نفسك. الهدوء ، ترتيب الأفكار و الصوت الهادي من أفضل الطرق لتوصيل الأفكار و التعبير عن نفسك

لو التزمتي ب 13 قاعدة إتيكيت دول نوعدك إنك تكوني غلى بداية الطريق للتميز في عملك.